108年全國語文競賽　客家語朗讀文章(高中組.四縣腔)

【記者廖金明／專欄報導】　編號01號【阿婆惜 [涯] 惜入心】劉玉蕉原作

風涼涼仔，日頭還囥在山背，𠊎就陪阿婆去公園行路咧，公園肚，運動个人無異多，毋過，怪奇个係，逐儕都識阿婆。「阿財嫂，出來運動哦！孫女恁乖，還等人惜哦！」，阿婆个老朋友毋會少，堵著一個問一到，阿婆笑微微仔異歡喜，𠊎就敗勢到歸朝晨面紅紅。放暑假咧，假使𠊎逐朝晨陪阿婆行路，慣勢了，佢恁多儕應該毋會過問正著。

轉屋下个路項，看著一個老伯姆渡等孫仔在廊仔下坐尞，該阿婆个腳尾躡 啊躡仔，腳膝頭就跈等一上一下掞啊掞仔，坐在膝頭面个嬰兒仔，暢到嘴合毋密 ，嬰兒仔笑，該阿婆也笑，嘴項噥哢該兩儕正聽得識个話語，𠊎臥頭 看一下阿婆，佢乜笑微微仔！這畫面，真熟事，對老頭擺傳了傳，傳到吾這代或者下一代都共樣，係分人試著真燒暖个一幅圖，主角緊換，親情無變，該年，𠊎乜係恁樣分阿婆掞大个。

一截路無異長，兩子阿婆話真多，佢講𠊎還細該下係噭眵嫲 ，異好噭，講𠊎黏佢黏核核，一無看著人就噭，任麼人拐都毋會恬，就係噭愛尋阿婆，故所渡𠊎變做厥个頭項大事。背等𠊎，佢愛顧菜園，愛洗衫、煮食，驚𠊎分蚊仔叼，隨身會帶等細罐麻油，想著吔就拿來挲一下吾个手腳、面，洗衫該下，摎𠊎背在背囊，衫緊洗緊搐還過愛噥哢，佢講洗衫無恁悿，渡𠊎實在有罅𠊎！聽到這，𠊎揇一下阿婆，燒暖个感覺無變，該輕輕柔柔挲麻油个手，還存留在吾个腦膈肚，該麻油个香，在空氣肚到今乜吂散。

阿婆惜涯，正經係惜入心，阿爸阿姆長年賣果子生活，逐日三更半夜就愛出門割貨，還係嬰兒仔个經，對滿月起勢，日連夜都愛跈阿婆食睡。肚屎枵咧，尋阿婆；跌倒咧，喊阿婆；頭燒額痛、歡喜慍悴，一路里來，陪在吾身邊个人，就係阿婆。忒親咧！幾半擺講話就會毋知進退，乜因致恁樣𠊎輒輒會分阿爸咄，講𠊎無大無細，欺負厥姆，毋過容𠊎个阿婆還係笑笑毋會譴。厥个笑，係知𠊎、信𠊎，有恁樣个阿婆，𠊎實在異有福氣。

阿婆个腳尾躡啊躡仔，腳膝頭掞啊掞，掞啊掞，𠊎大咧，拳頭嫲有力哩喲，阿婆啊！歇睏一下，換𠊎來同你捶背囊。

————–

編號02號　【燈籠】賴文英原作

老頭擺，逐年正月半个燈籠節，隔壁鄰舍个細人仔，長透會湊等共下，自家來做自家个燈籠，故所，𠊎兜燈籠个材質就用該兜手項便便做得用个，有蘿蔔仔、銅笐仔、紙仔這兜。𠊎最中意蘿蔔仔透出來个光，該係用湯匙摎蘿蔔仔中央个肉身部分挖空，當然，挖出來个部分還係做得煮來食，若係就恁樣丟忒，該就打爽，老一輩个人總係會分𠊎兜細人仔一隻觀念，做得用个抑係做得食个東西就做毋得儘採打爽忒，若係講就恁樣摎佢攉攉忒去，該就係「折福」。

燈籠做好，大家在暗摸胥疏个暗晡頭，儕儕手項都有一盞燈籠，擐等燈籠，遶到禾埕、田脣、竹林間、陂塘[聊]，滿哪仔冒險，試著恁樣形搞當生趣。在四圍無光害个莊下肚項，單淨就月光、星仔个夜色，還過火焰蟲摎燈籠光照等𠊎大自家、指引等方向。該央時，大家還會共下唸唱一條在莊下時行又應景个童謠：

火焰蟲，唧唧蟲，楊梅樹下吊燈籠；燈籠光，照四方，四方暗，跌落崁……。

這隻時代，一到元宵節个前一站仔，街項滿哪仔都看得著店面掛等花啦必駁个燈籠造型，也為著餳小朋友來買，有百百款个造型，全部都係塑膠製品，重點係毋使再過點蠟燭了，大概也係為著蠟燭火會帶來危險，驚細人仔一無注意著就火燒屋，故所，這下都係用電火球个燈籠。單淨一隻開關，加上電池，撳啊去，火就著了，再過撳啊去，電火就做得關忒了。在屋肚暗冬冬仔个地方，一開一關，燈籠光也就一明一滅，細人仔也就享受等恁樣个氣氛。毋過，細人仔搞到當歡喜過後，該隻燈籠毋係因為壞忒來分人丟忒，無就新鮮感無哩，分人擲到邊脣放，毋會再過分人重視了。包尾，佢還係分人準垃圾分垃圾車載走。物質算係罅用个時代，分後生人這一代嗄毋知麼个安到「儆惜」，也毋知麼个安到「折福」這兜語詞真正个意涵！

想想啊，還係當懷念老頭擺个燈籠節！雖然時代一直在進步，物質也緊用緊好，毋過，𠊎大自家應當愛來思考，愛仰般形摎老頭擺好个文化「儆惜」摎「莫折福」恁好个意義，一代一代篤篤實實个傳承下去！

==========
108年全國語文競賽客家語朗讀文章(高中組.四縣腔)

編號03號【糟嫲】何秋桃原作

見擺冬下兼過年時節，𠊎就會想起阿姆做个「糟嫲」。紅漬漬 个糟嫲就像年个代言人，放勢用佢一身啾紅，還過糯米發過後个酒香，間等年下个喜氣，帶來一種幸福个感覺，也係預告過年會到哩喲！枵鬼个細人仔，吂曾吂抵 就頭勾勾仔緊望，就望得係有隻糟嫲雞髀抑係糟嫲雞腳來喫，毋知有幾好。

阿姆做糟嫲功夫一流，酒香歸屋間，佢還會用豬肉、雞肉、鴨肉……變出好食个糟嫲肉。過年時節桌頂定著會有紅紅香香又餳人食个糟嫲肉，屋下兄弟姊妹看著這盤菜，隻隻目金金仔走到尾都會直，無幾久大家就食到恬索索仔無閒好講話，手指公吮到 嘖嘖滾響，阿姆總會在邊脣大嫲聲講：「毋好恁圖食，愛留兜分若爸食喔！」

冬節左右阿姆就會開始做糟嫲，佢講：「做糟嫲儘採毋得，尤其係紅麴最重要，愛擇較好兜仔个來用，若係發毋起，該就會像菜籃𠊎水做白工；另外酒愛用人家純米去焗个正會香，糯米愛用圓个正會補。」做糟嫲愛先蒸糯米，竹籠床舖等粄帕，摎洗好个糯米倒落去，用文火毋好忒猛，就會蒸出虬虬 又帶等竹香味个糯米飯。見擺看阿姆開始蒸糯米，𠊎就好在脣頭掌等，看等下做得先分著一碗來食無？阿姆會笑𠊎講：「還豺欸！吂得時好，就上合合，枵鬼正得。」在該無麼个零嗒个年代，毋豺就毋係細人仔囉！

糯米蒸好愛先放桌頂分佢冷，續等紅麴用酒先浸等，講麼个恁樣發酵正會發來較好；等糯米冷後再過摎紅麴、酒全部倒落去共下攪勻來，最尾裝入醃缸封起來就好咧。個半隻月過後打開來看，會鼻著一陣陣噴天酒香，該原本一粒粒吸飽飽酒个糯米，經過發過自家也會焗出酒來，變到像粥樣仔，歸醃缸糟嫲紅到當得人惜，到恁樣就表示做得食咧。愛食糟嫲肉，就摎肉先煠熟來，濾水濾淨，放落糟嫲醃缸肚去浸等，差毋多一、兩禮拜就做得上桌！這肉食起來有香香酒味，毋會油、毋會畏，總係餳到人舌嫲忍毋核蠕蠕動起來。

糟嫲就像美食个奇術師，料理千變萬化：煮卵酒、炒飯、蒸魚仔抑係單單攪飯全做得，毋單淨好食還做得補身體。今年過年𠊎決定自家來做糟嫲，借著做糟嫲个過程過一擺感受阿姆个溫暖。

————–

4.虬虬：音kiuˇ kiuˇ；彈牙有嚼勁。
==========
108年全國語文競賽客家語朗讀文章(高中組.四縣腔)

編號04號【快樂50】張旭英原作

 記得係𠊎讀高中个時節，這臺「快樂50」奧多拜 就牽轉來屋下，佢係吾爸第一臺騎个奧多拜，進前吾爸个交通工具本成 係騎自行車無就坐巴士。

吂退休个阿爸上下班騎「快樂50」去學校，退休後去宮廟做義工，還係騎「快樂50」來來去去。「快樂50」還有一件當重要个任務，就係放尞日愛載吾姆去市場買菜。該央時 細人仔就講「快樂50」係「買菜車」。吾姆生到肥擂擂仔，見擺看吾爸騎等「快樂50」載吾姆去買菜个背影，就試著佢兩儕人像愛去約會樣仔，吾姆个心情應該係快樂个！毋過「快樂50」毋知會佇毋著 無？逐擺菜買轉來，屋下人就知有好料理食哩喲！

後來吾爸做阿公吔！「快樂50」又增加一樣任務，就係愛載孫仔去逛街，逛啊逛仔，孫仔就睡忒吔，該央時个「快樂50」係「搖籃車」。逐日食飽晝，孫仔就會拿等安全帶分阿公，講愛去逛大路看火車，阿公就拿等鎖匙牽奧多拜出來，摎孫仔揇上「快樂50」坐好來過摎安全帶綁好勢。出發囉！兩子阿公个心情應該係快樂个！

𠊎一直無機會坐「快樂50」，到𠊎去外地讀書轉來愛倒轉去學校讀書个時節，愛去車頭坐車赴車枋 ，吾爸牽奧多拜出來載𠊎去車頭，正有機會坐著「快樂50」。每擺吾爸就會提前一息仔時間出發，就驚𠊎無赴著車枋。該央時个「快樂50」係「親情車」，𠊎試著一等幸福。毋過摎前面講个「買菜車」、「搖籃車」無共樣个係，兩子爺个心情因為愛離別應該毋係快樂个！尤其係𠊎坐上巴士，車仔發動愛出發該時，看等阿爸騎等奧多拜離開个背影，吾目汁毋知仰般就流出來。

客家諺語講：「爺娘惜子長江水，子想爺娘擔竿長。」爺哀關心子女个心，遠遠就超過關心自家。這下回想「快樂50」係三、四十年前个事情，吾爸過身也二十零年吔！吾爸還在个時節，𠊎自家從來毋識載過阿爸，𠊎也毋知吾爸到底換過幾多臺奧多拜，毋過，𠊎單淨知「快樂50」這吾爸个第一臺奧多拜，帶分歸屋下人當多个快樂。
—————

編號05號【竹凳伯姆个大手帕】楊世玲原作

 歸莊頭个人看著佢兩公婆，通棚都喊竹凳伯同竹凳伯姆，因為戴厥對面个妹仔、婿郎同吾屋下係兩隔壁，𠊎就跈等佢兜个三個外孫仔喊佢兜「姐公、姐婆」，老人家戴个細瓦屋，無禾埕、無丹墀坪，單淨一間屋，囥在竹籬門牆裡背，廳下有隻棚頂，一入門个左手析，放有一隻竹梯排，愛用著个時節，就徙正來蹶上去棚頂尋東西，平常時就等佢凴壁企在愛入灶下个門脣。論真講起來，歸大隻棚頂，除忒年下仔愛賣豬个時節正會用著个大量，全部都係佢兩儕愛做桌凳同籃𠊎个竹料仔。

竹凳伯姆有一條大手帕仔，毋知本旦係麼个色，𠊎試著𠊎兩三歲會去厥屋下過家尞時，看著就係烏𪐞紅、烏𪐞紅个色，毋過還有花剌花剌个印跡，乜毋知係原來个花草，抑係洗毋𠊎个屙糟底仔。逐擺熱天時，該條大手帕，總係吊在竹凳伯姆大衿衫个布鈕空該位，捽汗、捽嘴全毋使敨下來。冷天時佢就準像一頂抵風抵寒个帽仔，竹凳伯姆連睡目都包等，莫講佢毋盼得脫下來，𠊎還較毋好看著竹凳伯姆解忒佢。

𠊎記得看著第一擺這條大手帕仔分佢解下來，就係跈佢共下去菜園改番薯該擺，佢分躍起來个蛇哥嚇著，钁頭偏走嗄來磡著厥腳趾公，𠊎嚇到噦噦滾，佢對大衿衫个布鈕空解下該條大手帕仔，摎血流血著个腳趾䌈緪過纏纏啊，擐等番薯籃，牽等緊行緊噭个𠊎，轉到細瓦屋，扯爛一支竹凳伯食个吉祥 ，敨開手帕同菸絲仔放到爛綿綿个大腳趾面頂，本本纏倒轉去，就跛啊跛仔行去灶下煠豬菜咧。第二擺係渡𠊎去河壩脣，割愛晒來縈草結个芒花，鐮仔對厥手指尾溜 啊過，黏時血就噴到歸草竇滿哪仔，𠊎這擺驚到嘴擘擘，嗄噭毋出聲，佢解下包在頭那頂个大手帕，將歸隻手巴掌纏到緪緪，拈起腳面前个鐮仔，像無挨著樣仔，續等割草。第三擺就係送厥妹仔同婿郎去車頭轉來，佢將面怕弇在面項，睡在眠床頂歸圓身緊顫，雖然無出聲，𠊎看得識佢在該噭。背尾聽講該兩公婆，一儕揇一個無好醫个細人仔，上臺北去分先生看。

 竹凳伯姆个大手帕，包等客家餔娘人个堅耐同認份、也包等客家阿姆、阿婆對子孫个關心摎痛惜！一條褪色粗粗个大手帕，包等个係一等溫柔恬靜又縮結 揫亼 个客家婦人家个心！
————-

編號06號【麻竹坑】陳宜楠原作

無講無見奇，毋講你毋知，紹介一個生趣个所在，這位所，春夏秋冬，一年透天景色盡靚，盡餳人，無論愛看山景，還係愛遶山花，來這位，定著尞到歡喜歸日，毋知好轉。

客家莊个麻竹坑該所在，你識聽過無？佢在臺中市新社區，較接近和平區，偎東勢方向大甲河个東片，安做天冷，過了天冷橋，該大甲河个西片，安做麻竹坑，福興係里名，頭擺種盡多麻竹，正安做麻竹坑。

佢有幾闊，你知無？來舉個例仔，講分你知，大臺中市个行政區域，新社區係排第二闊，本區十三里，福興就占兩股一股个面積，一個里比歸個石岡區還較濶，比該世界小島國，諾魯个土地大十倍不止。

九二一大地動了後，麻竹坑發揮客人晴耕雨讀个客家本色，社區總體營造比賽，全國打頭名。麻竹坑，山靚水清地理好，這位有，歸大莊个客家子民，這位有，醹醹个人情味。屋簷水點點對，上輩對下輩，客人忠孝傳家个傳統，在這位隨處可見。

客家人係靠山絡食个族群，發揮佢兜開山打林个勇氣，在這位歸山餳人食个果子，白毛臺个巨峰葡萄、椪柑、甜柳橙 ，頭櫃、二櫃个枇杷、甜柿、甜桃，做下都名揚國內外。

大圳溝白冷圳个源頭係大甲河，佢流對麻竹坑个側膁過，這長流个水，灌溉𠊎个土地、圃園之外，分𠊎人用水、食水都利便。麻竹坑个藍色天頂，輒常會有一陣一陣个白鶴飛過，熱天時節，清清个河壩水項會有大人細子搞水沒汨淬 ，麻竹坑个大廟福天宮，香火興旺，保祐歸莊人平安順序。

「二餘草堂」係本社區「大林國小」詹進有先生退休了後，自家規畫用心打造，佢希望社區大大細細在「學業」、「農事」之餘，老老嫩嫩來學寫大字、學手藝，該位既經分人看著客家文化傳承个前景。

這社區个大鼓陣，也代表麻竹坑客家音樂同精神个延續，鼓聲，一陣一陣響起，打響土地个生命力，鼓聲，一陣一陣過再響起，傳出聽著社區个幸福同願景。有閒來尞，甜甜个果子在該等你，有閒來尞，靚靚个好山景，在該等你，有閒來尞，醹醹个人情味，在該等你。
———-

2.沒汨淬：音mud mi qi；潛水。
=======
108年全國語文競賽客家語朗讀文章(高中組.四縣腔)

編號07號【巡田水】郭亭妤原作

 對𠊎知人我起勢，屋下就在蒔田，阿爸耕个田離水源較遠，愛「開陂作圳 」，正有水做得蔭田；若係有想愛用共條圳溝水个人，就愛共下來𠊎手開陂塘、作圳溝，圳溝用久會漏水，大家還愛共下來作圳補漏，同圳溝整好勢，恁樣，大自家个用水正會利便。

愛用著這條圳溝水就愛輪水鬮 ，照理講，輪到別儕用水，大家就愛守規矩讓水分人用，盡驚堵著有私心个人，會同別儕个水偷偷仔壢去 自家个田項，因爭恁樣，輪著耕水尾田个阿爸蔭水个時節，長透半夜愛去巡田水，驚怕有人會偷旱去用，自家个田就會毋罅水好蔭。

有時輪著半夜蔭水，阿爸、阿姆就愛去巡田水，阿爸个膽識較大，總係自家擎等電火就去田項，上上落落、行來行去顧田水，若係有堵著水分人旱去 ，佢就遽遽搬兜大石頭去同水擱 轉來；阿姆較無膽，輪著佢个時節，長透會半夜同[涯]搖醒，喊𠊎同佢做伴去巡田水，目睡覺分阿姆吵醒實在還艱苦，真想起頓屈 ，毋過又毋盼得阿姆自家去，𠊎還目摸目罅 就揪等阿姆个衫腳，拖拖挷挷、半行半走跈等阿姆去到田項。

 還記得有一擺，更深夜靜，𠊎兜在田脣巡啊巡，嗄看著遠遠个大樹下，有一個著等白衫个人囥在樹背，𠊎兜驚到激激顫 ，兩儕手牽緪緪，連大氣都毋敢敨，等好久 ，該人無行過來，[涯]兜也毋敢行進前，就恁樣直直耐到天普普仔光。

包尾，阿姆佇毋著咧，拉等𠊎慢慢行兼去，看該人到底愛做麼个？短短五、六公尺遠个路，𠊎兜緊張到流歸身汗，真無簡單耐到大樹下，一看真，𠊎兩子哀嗄笑出來，原來係有人放一堆肥料在大樹下，又用白色个布篷同佢弇等，該布篷分風吹到膨膨，當像有人著等一領白衫企在該項，阿姆講：「阿姆哀唷～自家嚇自家，硬硬會嚇𠊎一層皮咧！」

同阿姆共下巡田水，既經係幾下十年前个事情咧！到這滿來，也毋記得該央時有幾艱苦，單淨記得該站時間，阿爸、阿姆為著分𠊎兜有較好个生活，齧等牙根打拚，實在當感謝。
————-
1.開陂作圳：音koiˊ biˊ zogˋ zun；開闢蓄水池，整建引水道。

2.蔭：音im；灌溉。

3.輪水鬮：音linˇ suiˋ kieuˊ；輪流引水灌溉。

4.壢去：音lagˋ hi；破壞水道引水。

5.旱去：音honˊ hi；攔截、接引。

編號08號【[目甫]等 】黃美貞原作

在伙房項大个細人仔，總有講毋煞棚个生趣事。無論份家啦飯仔、揇腰跤仔、抑係囥人尋、煨番薯，有誒三五儕仔共下尞，該下晝又係一隻歡喜个好日仔。

𠊎盡記得搞囥人尋个時節，歸伙房係𠊎兜个遊戲場，時間一到，講乜奇怪，這兜山猴仔連連續續對屋下瀉出來，上屋个阿雪嫲、下屋个阿勇、隔壁个阿明頭，還有竹園肚个阿隆仔，鬥起來兼兼仔有十儕，大家在阿公婆面前个大禾埕集合，猜拳好勢，贏个人揞等面偷笑，早就想便愛囥个所在，輸个人面就竵忒一析，心肚愐想這闊野野个伙房，愛對哪尋起勢 ，伏在楯仔項從一算到一百，頭那斡啊轉來，無看著半隻鬼鳥影，正係煩慮个開始。

有一擺，輪到𠊎做鬼，一百算忒目珠擘啊開來，四圍恬索索仔，探頭看啊去，連大狗牯就毋插𠊎，一儕人呆呆坐到樹頭下，發琢愕當久。旋旋風想著耕田人等兔仔个老古，無定著會有人自動送上門來，顛倒𠊎去尋較遽，[涯]等一定有希望，𠊎越想越暢，自家嗄[涯]出來吔！𠊎先跍在圖牆下，目珠像鷂婆樣仔，眼精精仔監視其他人个行動。過吔成十分鐘仔，阿雪嫲就撚等鼻公在牛欄肚走出來，準備摸楯仔，佢恅著鬼出去捉人，無提無防，𠊎在厥尸背尾大聲一喊：「捉著阿雪哩。」續下來，阿珠乜對竹頭下瀉出來，又分𠊎抓著，佢講：「再過囥下去，𠊎強強乜會分蚊仔扛走。」阿勇轉屋下食耳公糖，食到舐嘴舐鼻，手項還有餅仔香，對厥屋下弄等來，毋使講又分𠊎捉著哩。天色漸漸仔暗分咧，時間乜差毋多吔，𠊎抽胲大聲喊：「放──牛──食──草」，大家黏時牙哂哂仔，三步做兩步腳飆出來，煞猛展自家囥个好位所，做鬼个尋毋著。

準備愛轉屋个時節，阿隆仔著驚一下講：「欸！仰無看著吊尾錘，佢到底囥到哪去吔？係分芒神仔牽去，就河壩跑馬──壞蹄咧！」阿雪嫲目汁含等講：「吾姆有交代，老弟愛渡好，這下愛仰結煞正好？」人愛靈通，火愛窿空，好得伶俐个阿珠想著：「平常時節，吊尾錘盡好搞香精骨 ，輒常搞到歸身仔紅冬冬仔，無定著還搞到毋知分醒哦！」大嫲陣人就行到田頭伯公下，看著厥手項扡等歸把仔香精骨，伏在神桌項睡忒吔，面頰卵還有吂燥个口涎水，大家都笑到耐毋得，佢正擘嘴擘鼻講：「你兜在這位做麼个？」又係一陣笑聲，正結束這場人个遊戲。每擺看著細人仔搞囥人尋，𠊎總會愐想著自家一儕，恬恬仔跍在圖牆下𠊎等人个時節，該幾分鐘仔試著像過忒一點鐘恁久。
————
1.[目甫]等：音pu denˋ；在暗處偵察窺伺。

2.煞棚：音sod pangˇ；戲劇演完、結束了。

3.起勢：音hiˋ sii；開頭、起始。

編號09號【懷念阿公】曾秋梅原作

還細時節跈爺哀歇在北部，該下仔，𠊎正讀幼稚園中班，無愁無慮个年紀。一到放尞，就會吵爺哀帶[涯]轉老屋，因為老屋有𠊎盡好搞个場所——禾埕，又還做得走到闊野野个田坵仔搣鬼搣怪，自由自在。該時節阿公還當健，見擺[涯]兜轉到老屋，看著[涯]就暢到同𠊎揇緪緪，緊講：「在屋下有乖無？去學校有聽先生个話無？」阿公知得𠊎無一時閒，蠕蠕動像屎蟲樣仔坐毋核，頑皮又搞怪个細人仔，係佢最愁个孫仔。

一個立秋後个臨暗仔，阿公牽等吾个手，行在青溜溜仔个田脣路項。𠊎像草蜢樣仔掝掝跳靜毋下來，緊想奮[涯]阿公生滿老人斑又粗鱗鱗个手巴掌。阿公同吾个手揢到緪緪，毋分𠊎離開厥身邊，驚蠻皮好搞个𠊎一無細義來跌倒。

 奮啊奮仔，𠊎奮𠊎阿公个手，暢到一下仔去逐野花頂項跳舞个揚蝶仔，飛來飛去个揚尾仔；一下仔去撳菜園肚个細[虫另]仔，一下仔又去承田頭脣浡出來个泉水來食。毋過𠊎乜不時斡頭去看阿公，驚阿公毋見忒。

日頭漸漸仔消失在田園樹尾，𠊎搞𠊎吔伏在阿公个背囊項，無愁無慮个睡到齁齁滾 。阿公硬程康健个圓身，揹等𠊎緩緩仔行轉轉屋个路，毋敢大步行，驚吵醒揹在背囊項還在該發等逐揚蝶仔夢个𠊎。

十過年後𠊎大學畢業，轉去鄉下老屋，除了做得食著叔姆精心煮个客家封肉，主要係陪阿公泡茶打嘴鼓。該日臨暗仔阿公愛𠊎扶等佢去田坵仔行行啊，正發現著阿公無像頭擺仔恁健了，略略仔匍背，慢又毋穩个腳步，阿公老哩！阿公緪緪揢等吾个手，這一擺，毋係愛保護𠊎，係驚佢自家腳無力來橫倒。田坵仔，既經看毋著浸青个禾浪，淨看著一大園檳榔樹，阿公搖頭發出細細个道嘆聲，𠊎感受著阿公該份辛酸。

阿公坐在堋項 ，像會燒過个蠟燭，弱弱个燭火。細細聲仔同𠊎講：「頭擺，這附近都係荒涼靠天絡食个田坵，今這下牛車路變大路，也起了當多靚又派頭个屋仔。你將來定著愛長進 轉來，起大間个屋仔分若爸佢兜歇。」𠊎看一行行修直 个檳榔樹，對等阿公講：𠊎毋會分你失望个，阿公放心啦！」阿公聽著𠊎恁仔講，歡喜到笑起來，滿足个笑容，充滿希望个眼神，就像該年仔看著恁頑皮个𠊎共樣。

無幾久仔，惜𠊎个阿公過身了！出山該日，𠊎兜歸家人都盡毋盼得阿公个離開，目汁濫泔跈等大屋 後背，陪阿公行忒人生在世个最尾路程。

———-

108年全國語文競賽客家語朗讀文章(高中組.四縣腔)

編號10號【灶頭舊事】徐秀英原作

過年前，吾屋下請油漆師傅來油漆。師傅講，若後尾門分老鼠囓一隻大空哦！看著囓壞个紗門，心肝頭一下仔像著著釣樣仔揪緪緪，氣就敨毋出。老鼠係𠊎童年个惡夢，原旦想，今這下歇高樓就毋會有老鼠，無想著道高一尺，魔高一丈，這隻老鼠魔，正經毋想分𠊎好過年喺。

還記得該正過忒年个臨暗仔，輪著𠊎暖燒水，阿姊帶老弟老妹去禾埕，同伙房裡肚个細人仔，共下搞囥人尋同踢銅笐仔，留𠊎一儕人在灶下燒樵。掌火个事頭實在當無聊，目珠尾睞著棧櫥項有幾垤晒燥个甜粄乾，就拿火鉗同甜粄夾等分火焙。金黃色个甜粄開始結[火剌]ladˋ，略略仔臭火煙个味緒實在餳人食。正焙好个甜粄會熝手，無辦法落嘴，就隨手放在灶頭項畀冷。

灶頭頂還有一碗阿姆下晝𠊎个豬油，還溫燒溫燒仔。𠊎偷添半碗个舊飯，攞一調羹个豬油同豆油，坐在灶頭下个矮凳仔項，一下仔就划淨淨。伸手去拿該垤甜粄，手嗄分重鈂重鈂四隻腳生毛个東西蹬過去。𠊎恅著係貓仔，手一拂，吂知跌在吾面前个係一隻像貓仔恁大隻，會嚇死人个老鼠。農家屋有老鼠毋係麼个怪奇个事情。輒輒倉庫一打開來，老鼠一哪仔舂上舂下。割禾个時節，飯桌頂[火辟]燥个老鼠肉還異扯飯咧。眼下這恁大隻个老鼠，毋知偷食忒吾屋下幾多袋穀，仰會像貓仔恁大隻。

這隻老鼠，動作還遽哦！尾一瀉就蹶上灶頭，咬等吾个甜粄，順等煙涵，跋到天篷。甜粄無了無打緊，無幾久這隻老鼠又趖到轉來，趖到煙涵，頭那向下，尾座頂，看著𠊎拿火鉗緊掝，厥个嘴擘到大大，當像愛同人拚生死樣仔。𠊎嚇佢毋走，高不將就走出去尋大人[捲]ten手。吂知，𠊎一起腳愛走，灶下嗄著火了，好得阿哥看著，大家[捲]ten擐水來潑正無燒起來。該暗晡，𠊎無飯好食，好得臨暗仔有偷食半碗飯，係無，夜仔恁長愛仰結煞正好？阿爸監𠊎在灶君爺前罰跪，無人相信有恁大隻个老鼠，𠊎緊跪緊噭，跪到兩隻腳烏青，第二日腳就毋會行，到這下老鼠同𠊎个冤仇結大哩。

為著毋分屋下變老鼠竇，𠊎煞煞走去五金行買幾垤黏鼠枋，又在枋仔个中央放一細撮个番豆。第三日个朝晨，後尾門正式黏著一隻老鼠，老鼠尾還拂啊拂欸，該對老鼠眼，還係惡豺豺个視等𠊎，毋過，這擺𠊎贏哩。
===108年全國語文競賽客家語朗讀文章(高中組.四縣腔)十篇===