【客語文章】篇名：猴再世《海陸鄉野傳奇》（9）作者：詹益雲（海陸腔）

文/詹益雲

現代科學發達，資訊傳送當遽（giag），you tube寧，常會看著全身也係講半身生來人毋成人，猴毋成猴，歸身毛鬞鬞（nŭng nŭng），也有一隻手也係講一隻腳生毛个，頭擺人講，該係「猴再世」。

我姆聽老輩人講，我滿姨丈出世時，厥婆佇厥姆唇邊掌寧，摎產婆𢯭（tĕn）手檢孲𤘅（o nga），孲𤘅一出娘胎，無開聲。一般來講，孲𤘅一出世，產婆摎孲𤘅屎肳（vud）一打，馬上就會孲𤘅孲𤘅噭出來，毋過這孲𤘅並無開聲，歸身毛鬞鬞，根本就係一條細猴子，做人家娘个，就係我滿姨丈厥婆啦，登時拿條尿布摎孲𤘅一包，孲𤘅隨口就孲𤘅孲𤘅噭出聲來咧，歸隻猴身也馬上回復變轉人形，毋會猴頭猴腦，全身毛鬞鬞摎猴爪乜毋見忒淨淨，摎一般孲𤘅共樣，無麼个差別咧。

這件事情除了厥婆摎產婆知以外，連厥爸摎降佢个阿姆都毋知，

無人敢摎厥姆厥爸講佢降隻猴子，這件事情就恁樣暗崁（ăm kăm，）寧，以後也毋識有人提起過。這孲𤘅仔緊來緊大咧，當聰明，猴精仔樣，也無人知佢係猴再世。

一直到這細人仔十歲該年，厥姆摎厥婆兩子家娘相吵仔，吵到八幡底，做阿婆个當閼，人講个「相吵無好話」，講毋得个話也緊講，全無想著細人仔就佇佢兜唇邊企寧，做阿婆个當寧細㹻（o）面罵厥姆，「恁會哩，降隻猴子！」。講啊出，正想著自家講差咧，毋過，講出个話，收馬毋轉，這細人仔登時左手就瘸忒，滿手毛鬞鬞（nŭng nŭng）。到該下，厥姆正知得，厥倈仔係猴再世。自該以後，這細人仔，一生人不管幾熱个天都毋敢著短袖仔个衫，驚怕分人笑講佢係猴再世。我滿姨丈結了婚做水果販仔，騎寧自行車佇新埔割水果，一隻手無力，一隻手扶寧載寧重重水果个自行車，蹶上又長又企个南蛇崎到龍潭賣，賺兜錢來畜一群大細，實在艱苦，無簡單。

毋知係人常講个無？台灣地理薄，也係講祖上德薄，鼇人畜毋起？我滿姨丈明明係鼇人再世，大咧一定大富大貴，係隻慶人，吂知到十歲時分厥婆破忒，勞勞碌碌過一生人，無該个命，拗命（ău miang⁺）毋贏。時也，運也，命也！天命不可違。

【註解】