壁蛇仔 不情不義的故事

【記者廖金明／專欄報導】　在一個細雨毛仔落冇moˇ停的臨暗,路邊介壁上hong掛等一盞zanˋ路燈,在這個壁上先後來了ieˇ三隻公介壁蛇仔,惦惦diamˊ地meˊ守候在電球仔veˋ介ie腳下,等蚊仔衝zungˊ過來時,趁ciin機捉來食,這三隻壁蛇仔等了neˇ蓋久,目望望mong地ngeˊ無等到半隻。

脣sunˇ口該ge隻壁蛇哥仔無眺diauˊ無知看到doˋ遠遠一隻体態有姣gauˋ又靓jiangˊ的nge壁蛇小姐,就將前兩腳隻挺tenˋ起來拍腳表示歡迎,吂mangˊ知後腳無企稳iunˋ,就對壁上種zung下來,失神跌落在地,只有尾跌断在地跳來跳去。

第二隻壁蛇哥仔看頭先壁蛇哥仔跌落在地,只有尾跌断在地跳來跳去。不管是生是死,續sa一時高興起來,心中愐menˋ想,恁靚的nge壁蛇小姐,追求的ve對手又少了veˇ一隻,第二隻壁蛇哥仔暢tiong啊nga緊伸腰,同時两後腳舉ngia起來拍pogˋ脚,吂mangˊ知前腳無扭neu稳iunˋ,就對壁上種zung下來,失神跌落在地,又係只有尾跌断在地跳來跳去。

頭前兩隻跌落地的情形,又分第三隻壁蛇哥仔看到了veˇ以後,不但不提高警覺。反過來,也係非常高興的me在該緊拗auˋ腳趾ziiˋ緊算,心肚在該ge緊想：這下涯好彩coiˋ了ieˊ！頭下連連跌兩隻,這下愛追來壁蛇小姐介,也係淨淨剩cunˊ到涯一隻了geˊ！係一對一,也可以講得係涯一隻介專利啦！機會全包,安onˊ啦！所以這隻壁蛇哥仔想到這點也係高興到止斬zamˋ忍耐唔住hed！所以又將兩隻後腳挺tenˋ起來拍腳喊好！死了ieˊ！腳都唔前拍,[慱bog！]聲地ngeˊ又係對壁頂高跌落下來,又係直直眠啊na在地泥頂高,只有該ge跌斷的壁蛇尾在地泥上發fagˋ來發fagˋ去。

最尾！在這個路燈介壁頂dangˋ高,淨淨qiang伸(剩)cunˊ到一隻壁蛇小姐。該ge時節,雨也停了neˇ,蚊仔neˋ也係漸漸地meˊ飛來又飛去。該時節,頭下的三隻壁蛇哥都係橫vang落在地,唔知係生sangˊ係死,伊都冇moˇ時間去想,心肚裡淨淨在該ge愐menˋ講：這下！恁anˋ大塊介壁頂高,淨有涯ngaiˇ一隻。所有衝zungˊ入來的蚊仔,隻隻都係涯介份,並冇moˇ其他的來搶食！所以伊也係歡喜到會死,爽到止斬忍耐唔住hedˋ！又將兩隻前腳舉ngia起來,當前腳一舉起來愛拍腳介時節,同樣地nge[慱bog]聲地又對壁頂高跌落橫下來,奇怪！樣ngiong會恁anˋ準！的dag對！就係層cenˇ啊na在第一隻壁蛇仔介身上hong。

恁anˋ地neˊ前前後後,四隻壁蛇仔一隻又過一隻一隻介跌落種(縱)zung下來,失神昏忒hedˋ眠在地泥頂上,頭到do最先跌落下來的該ge隻壁蛇哥仔,分最後跌落下來的壁蛇小姐一撞cong就分funˊ醒過來,這隻壁蛇哥仔也係當有良心,看到這種情況kongˋ,就爬bagˋ過去將其他一隻一隻來搖畀biˋ分funˊ醒,同時喊伊等大家緊緊爬上壁來。嘎ga冇moˇ！大貓公一來,隻隻都會畀biˋ咬死！

當這四隻壁蛇仔爬bagˋ上了ngeˇ壁以後,由最先跌落下來的壁蛇仔招邀ieuˊ開了一個檢討會,檢討議論講：涯等壁蛇仔,都係有祖傳行壁介功夫,係專門行壁路介哩！何能大家插cabˋ齊ceˇ會對壁頂高跌落下來呢？後背三隻壁蛇仔聽到這句話以後,愐menˋ到當時看到他人家跌在地的歡樂,都還唔曾qienˇ暢tiong束sod,所以伊等三儕saˇ都係用腳掩emˊ等嘴,唔敢出聲講出來,最後分bunˊ第一到do跌下來的該隻！大聲一喝hodˋ,正大膽又老實的le講出來；第一隻先帶頭講：[涯ngaiˇ]係為了迎接壁蛇小姐來封神,來胖pang頭,來奢saˊ鼻,來拍腳跌落橫vang下來介。

第二隻停了neˇ當久正zang講：涯實在唔mˇ敢講,愛講之前,愛先同大家會fi失禮,就係當初主席跌下去的時節,尾跌斷冇要緊,涯覺goˋ到伊橫死了ieˇ,當時又有恁靚介壁蛇姐在後背boi,唔使講汝等大家也知,該ge時節涯心肚裡一時歡喜,就舉ngiaˇ起雙前腳一拍,恁地滑vad了leˇ橫下來介。

第三隻接等講：涯的情況同第二隻的完全係一樣樣,唔過當時涯看到頭前兩隻橫啊nga死齧齧ngadˋ地leˊ時,心肚裡的歡喜實在係唔知愛樣般講,所以涯就將後背兩隻腳舉ngia起來拍pogˋ腳,奈nai知！前腳冇moˇ企kiˊ穩vunˋ,續sa頭做底下, 縱(種)zung下來,好在平常有練功夫,唔過這下還頭殷inˊ腦轉(係唔係地球轉忒tedˋ遽giagˋ啊gaˇ)！

第四隻壁蛇姐講；照汝等頭到do所講所聽,第一隻跌落橫下來還有[情由]可原諒,像；第二同第三隻完全都係見色失友嘛maˇ！係he喲！涯自家四兩箕giˊ仔冇moˇ除,涯係看到恁到蚊仔飛來時,一時高興跳起來歡呼台灣自由萬歲soi！恁anˋ地neˊ跌落下來介。

最後由第一隻做主席介壁蛇仔做結論講：做壁蛇仔就愛做好[道德情義],奈nai可以為了[食同色],就做出不同情又不講義氣介道理呢？汝等看啊na是,這下儕儕saˇ都係斷尾介壁蛇仔,實在見笑噢voˊ！從此以後大家愛有[想到自家好又係me愛分享他人家]介[慈ciiˇ心],以及自家唔愛moiˊ介.也唔好斂lien人去受苦,愛[悲biˊ心ximˊ]。大家千萬愛記在心肚裡,唔使寫會議記錄,會議結束！散會以後,各儕saˇ自家去落logˋ食！

◆本文客語四縣腔注解： 1.壁蛇仔veˋ：壁虎。又稱粘ngiamˇ蛇仔。壁虎→釘壁介釘仔。2.雨毛仔veˋ：指很小的雨。臨limˇ暗：傍晚。惦惦diamˊ地meˊ：靜靜地。3.[涯ngaiˇ]：我。[涯ngaiˇ]字一般電腦無這隻字,愛用企人片部首。 4.目望望mong地ngeˊ：癡癡地等待看。趖soˇ：慢慢地爬行。 5.冇moˇ(pang)：無。[有]xioˊ：稍有,[有]xioˊ字月內少一橫。 6.行兼giamˊ來：走近來。溓liamˋ水。尿馦hiamˊ。 7.心肚裡：心裡面。嫌hiamˇ疑ngiˇ。疑ngiˇ狐fuˇ。 8.該ge時節：那個時候。該央iongˊ時。 9.睞laiˋ：女孩子低頭看人,如河洛話：駛目尾。視sii人：直看。 10.靚jiangˊ：美麗。[腊jiangˊ]豬肉：昔字改青。禾仔菁jiangˊ。 11.慱bog：掉落下來的聲音。心肝慱慱飆beuˊ。 12.企kiˊ起來：站起來。跍guˊ：蹲。 13.眠minˇ：躺,小睡。伸cunˊ一下腰：躺下休息。 14.發fagˋ來發去：前動後動不離位。發fadˋ財。發bodˋ病。 15.現下：現在。今[下]音ga。發fagˋ條：彈簧。 16.止斬唔住hedˋ：停止或斬不了,一直續sa下去。 17.樣ngiongˋ地ngeˊ：就這樣。樣ngiongˋ的nge：指那一種。 18.分bunˊ：給。分bunˋ：分bunˊ你。畀biˋ：[分bunˊ佢]合音字。其iaˊ(厥giaˊ)：他的。吾ngaˊ：我的。 19.唔住hed&唔住hedˋ：不住。扭neuˋ住hed。 20.失神：失去知diˊ覺。知zii識siidˋ。昏hunˊ。暈hunˇ。21.橫vang：左右方趺下。翻panˊ：仰倒。覆pugˋ：面向下倒。22.後背boi：後面。頭前：前面。頭下：剛才。伏：fug&pug。 23.橫vang：左右倒下。滑vad下來：斜斜掉下。 24.縱：由上向下倒。縱(種)zung筋斗。[門中加阿]oˊ：土一直倒。25.封神,胖pang頭,奢saˊ鼻：愛現。 26.好彩coiˋ：福氣好,好彩caiˋ頭。 27.第一到：第一次。頭到,頭滿,頭下。 28.覺goˋ到：感覺gogˋ到。[覺]有(gogˋ,goˋ,godˋ) 音。 29.挺tenˋ起來：用腳盤前趾著地企起來。 30.舉起來：舉有三音。選舉giˋ,舉ngiaˇ手,舉ngia腳,舉(擎)kiaˇ腳頭。拍有二音：拍pogˋ手,拍pad開。 31.層cenˇ在頂高：層疊tiab在上面。 32.爬：地上爬paˇ,爬(跋)bagˋ山。[爬爬paˇ爬爬(跋)bagˋ]。 33.上：客語(直直上songˊ),(上song面),(面上hong),(上songˋ上songˊ去,上songˋ香)。 34.圓ianˇ身：身體,全身。35.電球仔veˋ：電燈炮。又稱鴨abˋ胲goiˊ仔ieˋ。 36.畏羞xiuˊ：害羞。見笑：丟臉,不好意思。 37.落logˋ食：找食物食。
38阿姆哀oiˊ：阿姆！哀oiˊ哉zoiˇ(慘叫)。