農業經濟屙疤介警世症頭(客四縣白話語文篇)

【記者廖金明／專欄報導】　本文以農村習性研究農村經濟&行銷並以客家(四縣腔)白話語文(1985/5/19)寫作
想到頭擺baiˋ農家人介生活過日,實在係相似番人過日一樣樣！麼介落雨介時節,正拿番刀割茅仔來叢cungˇ屋,天晴時節就上山打獵liab來討生活,日頭落山食過飯以後,就揹凳den仔neˋ放在禾坪tangˇ上,腳一架,拿絃仔來鋸和 foˇ音唱山歌。這種生活的方式,雖然係嶄zamˋ滿逍遙快樂來過日仔leˋ,但是時常在愛煮飯介時節,正知得囥kong米介胖缸肚裡係畜hiugˋ一隻大龜仔(空空無半粒米)。姑goˊ不而將,就拿等米升[匝biang]啊nga在後背尾蓋壞勢se來借米煮。這種快樂又窮苦的環境,當時來講也係一個蓋goi平常的事。

在當時來講：麼介係經濟問題？樣ngionˋ地ngeˊ來解決這個問題？大家也係毋會來想來愐mienˋ,講到農作物方面的耕作,也更至生趣；麼介看到隔壁鄰舍種甘蔗,伊也來陪piˇ陣跈tenˇ人家來插甘蔗。看到人家畜牛仔,伊也湊teu陣來畜牛仔！當時種的農作也係畜hiugˋ的投teuˇ生仔ngeˋ,可以講得係大家共下來的集體活動一樣。

後來經過時代介變遷qienˊ與 iˇ學識的增加,農家人介種作,對於[經濟]兩隻字正有略liog略地geˊ有進一步的認識與經驗到；凡事不講究giu經濟實在做唔得了leˇ。尤其為了天光日,為了將來自家抑iaˊ係子女介前途,不得不在自家介耕作上,想儘辦法來賺較go多一些xidˋ錢,來加添家庭生活的費用。但是在農家經營耕作方面,又時常腆tiamˇ放biong忒hedˋ了 leˇ麼介係[經濟市場]方面介問題,淨淨覺goˋ到認真頭[犁laiˇ]犁地 ieˊ來耕作,只要生產量多,品質有姣gauˋ,就會包伊大賺錢等等保守介觀念,結果造成了蓋多使人怨嘆的ne話講：做到會死,餓ngo到會死！這到底係樣地ngeˊ造成的ne呢？這就係唔曉得頭昂ngo起來煞sadˋ猛mangˊ針對農業市場去分析問題,解決問題：

就以前面所講：人家插甘蔗,也來比beˇ陣種甘蔗等等一樣,到溜尾的結果又係me係he俗語所講：屎多狗飽。價勢大落價,實在係冤枉,這個情況就蓋像頭擺古傳canˋ仔neˋ肚裡所講：[賠poiˇ了ieˇ夫人又折zadˋ兵,做了媒人又打出本]一樣樣,所以農業耕作也係其他的事業上,就愛記得麼介係[經濟市場]介問題,以避免又著cog 到底下所講介農業可憐又冤枉的症ziin頭。

在這裡提出幾項在過去已經有發fadˋ作過農業經濟病介症頭,提供分大家來做參考,係he唔係me有影,假使較go後生介鄉親,若naˊ係唔知,有懷疑ngiˇ來認為係胡說一場時,請將本篇拿去拜問汝介阿爸,阿公來作鑒gam證：係唔係有[話虎膦linˋ]嗎？
————
◆—.敢種香茅者係太戇ngong鳥diauˊ：
一.在臺灣光復以前的日人時代,堵duˋ好大東亞戰爭,汽油相當地缺kiadˋ,日本人就鼓勵臺灣人來種蓖biˊ麻同香茅,用來尖jiamˊ油來煉油精,使得當時香茅油價勢相當好,農民大家就相爭將田埔肚裡作物剷到極kid光,獨獨來種香茅。當時初下來種香茅,大家都係絡lod興him,日也laˊ做夜也vaˊ做,連在樹頭下聊涼的時節,也iaˊ係用笠嫲maˇ緊ginˋ潑涼,緊ginˋ來研究[香茅經]。恁anˋ地neˊ煞sadˋ猛mangˊ來顧守香茅,將香茅顧守到一等好,尖出來介油量同油質,也係一級棒,比手指公介nge。

但是經過了一斬zamˋ時間不久以後,南洋大戰爭結束,日本戰輸後,香茅油介價勢馬上像傘sanˋ兵的[落下遮zaˊ]一樣,直插cabˋ下來,直瀉跌到無人來買,香茅種到恁anˋ靚jiangˊ又有麼介用呢？所有的香茅農猴死目死真係才過了veˊ！氣杳meuˋ杳地veˊ樣ngiong得生死,唔知愛樣地ngeˊ正好？田坵kiuˊ埔全部剷光來,單單種香茅,這下將香茅割來叢屋又用唔得,割來團[草結],燒火來煮飯,煮介飯又蓋臭香茅油,又食唔得！猴咧 leˊ！香茅農譴kienˋ到do蛤蟆胲goiˊ大麻鼓條！最後拿來一盒番仔neˋ火(火柴),捽cud一支來放biong火燒,燒到爽平極光,每日下晝頭將近日頭落山介時節,到處一奈naiˋ都看得neˋ到相似[假黎 liˇ仔 ieˋ]放火燒山一樣,東一片大火,西一片大火,連累燒死了ieˇ唔知一多香茅園肚裡的草脈magˋ仔。

就對這一擺以後,再也無人敢來種香茅與蓖biˊ麻了veˇ。頭擺有種過香茅介老阿伯仔,愐mienˋ到[種香茅]一事,心肝肚裡都會緊打忸nugˋ搭緊捶cuiˇ心肝講；發誓打死伊也唔敢再來種香茅了,同時會再諫kian罵人講：敢種香茅管人係大憨鳥！講到這一點會分大家想到經濟企業上的一句話：凡事單項功能與用途的產品也係作物,頭下價勢相似係黃金,尾下功能失效也係有代替品唔用時,價勢就變成狗屎一樣樣,做麼介都唔得。尤其像頭前所講,大家都賭注種香茅一種,實在係冒mo險hiamˋ,冒險,冒險啊maˇ！
————
◆二.連著西裝介也來畜鳥仔：
    二.在民國五十初年介時節,農村一帶都係風行[畜鳥仔]介副業,頭下畜鳥仔介利成也係相當好！所以住hed在農村介大家,唔管係戴笠嫲maˇ介農民,抑係著zog西裝食頭路介人,都係相爭買[子ziiˋ鳥仔]來畜。在當時畜鳥仔介熱注情況,實在也唔會輸目前簽賭公益彩券。這兜deuˊ畜鳥仔介人家,日日夜夜都係專心的me在該ge研究樣地ngeˊ來畜鳥仔,鳥仔愛用麼介飼ciiˇ料同方法來畜,較遽giagˋ大,鳥毛介色身又較金頭。所以款待鳥仔介表現,也比服侍伊介阿公還較go有孝心。每日將把鳥仔捉上唔捉下,都唔驚怕將鳥毛來捉落,畜鳥仔介熱注精神實在得人驚,搞到莊頭莊尾,家家戶戶都係有畜鳥仔！歸莊仔介人所畜的鳥仔,叫gieu起來的聲音,相似割禾時節,竹頭尾頂高的羅畢仔(麻雀)一樣樣,吱吱ji喳喳jia的叫聲,實在係會吵死人！當時畜鳥仔介人家,雖然鼻到恁anˋ臭的鳥屎,也係歡樂在其中,日日夜夜都在該ge望想鳥仔有好的價勢,將來收成賺大錢時,一定愛愜hiabˋ得beˋ些xidˋ把地veˊ私胲goiˊ錢來去大飯店來暢tiong樂一下,用麥酒來洗淨身上介鳥屎味！…等等一大掛的願望在該ge發bodˋ夢。

但是,過了一段時間,經過高明的[畜hiugˋ技]與大量的產量,所畜的鳥仔不但多又搭dabˋ有姣gauˋ,但係唔知後背有人暗中在該炒cauˋ做價勢。炒做鳥仔價數sii 的人,目珠也係金,拗auˋ指一算時機己經到了veˇ,生產量忒tedˋ多了veˇ,縮手就唔來收買,恁地neˊ的情形之下,鳥價又係直瀉,[嗶bid嚦lid暴bog落log]介跌下來,畜鳥仔介人每日眼睜睜ziimˊ地meˊ緊看伊介[文鳥,十姐妹,小鸚哥…]等等鳥仔,又想到鳥價跌到恁悽慘camˋ,實在係譴到緊踹demˋ腳！目汁向肚笥siiˋ肚裡緊吞,蓋痛腸的nge向鳥仔講：當時涯買汝入屋來畜時,每一對的ie時價係幾下百銀,現下淨淨剩 cunˊ到幾十個銀,這下唔係涯對汝無情,還係涯現時無恁多本錢來買飼ciiˇ料分bunˊ汝食了 leˇ,將汝賣分飯店來做桌上菜,鳥肉又像鼻屎樣iong地ngeˊ恁細塊仔ieˋ地ieˊ,楔xiabˋ牙齒縫pung都唔揫 qiuˊ,愛喚vanˋ涯樣地neˊ來做啊vaˇ？唉 aiˋ！將汝放去野生當過去齋堂食齋zaiˊ！

所以,就將一籠lungˋ一籠介鳥籠仔搬出來擺好,鳥籠蓋仔一隻一隻介打開,奇怪！奇怪！奇怪！鳥仔也知得,分人服侍慣了,愛喚vanˋ伊飛向奈裡去呢？所以鳥仔也表示蓋有感情,含hamˇ情脈脈magˋ地geˊ唔肯跳出鳥籠仔門,鳥農也唔知係愛樣地neˊ正zang好？耐心地再三拍pogˋ鳥籠仔,相似哀oiˊ求拜託講：眾鳥仔啊iaˇ！涯確實係苦到屙痢li肚了veˇ,債務台高已經高到鼻公空上hong來了ieˇ,汝再唔走,涯會分債務磡 kamˋ到透唔出氣來了ieˇ啦laˋ！希望汝飛出鳥籠仔自家去落 logˋ食。假使恁有緣份,希望汝等來日鳥價有起價時,再飛歸來團圓好嗎？恁地含淚lui傷心的me將一籠又一籠,一家又一家鳥仔飛出來,搞到滿天八地都係人家[假好心]來放biong生的鳥仔,造成了每日一群又一群在田埔肚裡,屋角頂高飛來又飛去,相似發bodˋ風災前的[揚尾仔](蜻蜓)一樣,恁大群恁多,假使目珠[較go中zung]介nge人,拿起鳥射仔(彈弓)一射,兩下手板就做得射到doˋ幾下隻來。

啊aˋ！可憐的ne鳥農啊ngaˇ,時事變天,牛腳向高天,明明當時畜的係珍ziinˊ禽kimˇ好鳥,到這下續sa 變成屋頂高的羅畢仔,田埔肚裡的青絲xiˊ仔,講到這一點會分大家想到經濟企業上介一句話：凡事後背暗中有人炒價勢的作物抑iaˊ係產品,實在係相似過去的地下投資公司,募集資金一樣,先下分大家有甜頭嚐songˇ一下,到了veˇ尾下就承siinˇ到相當菸冤枉的苦頭！世態生活愛有警覺的意識,正唔毋會勞碌lugˋ一生人,在一夜之間,就覂fung啊nga淨qiang淨！
————
◆三畜台魚仔賺到報報滾：
   三.在六十年前,若naˊ係堵duˇ到落大雨,大圳出汶vunˇ水介時節,在一般農莊介地方,就會有蓋多人,在雨停以後,緊緊將[開一爐](coiel)日本話(八地哩)把baˇ來去大圳肚裡電魚仔,準到運氣較go好時,恁該死,就會分伊電到一隻臺魚仔(鱉biedˋ魚),該時節實在唔知有一歡喜了ieˊ！歡喜的程度相似[番仔見到血]一樣樣。同時會蓋封神地將臺魚仔捉來向全莊走一轉,相似驚怕人家唔知伊有[一會地ieˊ]一樣！莊中大家知得某人有電到一隻臺魚仔時,也係會相爭走來看,拍拍手來[哦 oˊ嘮 loˋ]伊講：樣ngiongˋ會恁有福氣？在當時大家介觀念中,都一致認為台臺魚仔係相當補血又高貴的東西。所以,大家看[過癮(願)ngian]了neˇ以後,主人就會去店頭打兩罐紅牌介米酒頭,同時去中藥店撿一貼tiabˋ[四物仔leˋ]補藥,共下燉來分大家嚐 songˇ,汝一杯,伊一杯,大家食到拂fud 拂滾,同時嘴上搭dabˋ還會緊講：噢 oˋ！樣會恁好食,連舌嫲maˇ都險險吞落肚噢 voˊ！

初下,頭腦較好的人,就將電到的細隻臺魚仔留下來畜,來傳種。在當時家中假使畜有一口heuˋ臺魚仔介魚塘,可以講得係相當地風光,當時畜台魚仔介人,當驚人入來偷看抑係偷釣,所以在魚塘介四週圍,雖然結有圍牆還係唔放心,還愛在圍牆頂高架ga會刺qiugˋ人介三角竻nedˋ介鐵絲網,甚至還有人牽一條會電人介電線來加強安全。由此可見,在當初畜臺魚仔介人,係樣地ngeˊ的ie得意啊 iaˇ！怪唔得初下畜台魚仔介人,金票賺到報報滾！賺了唔會少錢,使得隔壁鄰舍sa大家看到時,心肝也係慱bog慱bog滾的ne緊想畜臺魚仔係樣地ngeˋ的ie[好空kangˊ],引inˋ起大家來畜。所以出高價買魚種來畜。

當買得ieˋ到臺魚仔種介初期,搶買細臺魚仔介情況,相似[鬼搶粄]一樣,無論大細隻的臺魚仔都係搶到無額ngiagˋ。拂fud聲地在莊頭莊尾都做得看到用紅毛泥(水泥)結的魚塘,一格一格,一口又一口介魚塘出現,滿魚塘肚裡漂peuˇ來漂去的細臺魚仔,實在係多,壯觀的ne程度可比[左營春秋閣gogˋ蓮花池]介龜仔還愛較go多。有一日有一個[腦囟xin發fagˋ發跳唔知麼介漦xiauˇ] 介細人仔,看到伊介阿爸恁熱注又畜恁多相似細龜仔介臺魚仔,就在大家人面前大聲的nge問伊介阿爸講：阿爸！阿爸！阿爸！汝樣ngiongˋ在魚塘肚裡畜了geˇ恁多細龜仔呢？愛畜來做麼介啊 iaˇ？伊介阿爸聽到了[畜細龜仔]這一句話,險險昏忒hedˋ失神,共快回答講：呸pui呸呸！破po缺嘴！破缺嘴！破缺嘴！汝發bodˋ[眼瘟vunˊ]了neˇ係嗎？真係目珠生絲 seˊ了 ieˇ！阿爸花了veˇ恁多錢買來畜的係高貴又補血的臺魚仔,你樣恁會來同涯講衰soiˊ封名[細龜仔]啊iaˇ？會譴死人！

過了veˇ幾下隻月以後,臺魚仔畜到大麻鼓隻,肥胖又有肉,都好愛收成來賣的ie時節,價勢確實又係直瀉跌下來,跌到相似細人仔所講的[龜仔ieˋ]一樣的價勢, 了liauˋ到血本無歸—。講到doˋ這一點又會分大家想到經濟企業上介一句話：物以稀 hiˊ為貴,像頭前所講,大量賣[臺魚仔種]來貪利,造成了生產量大大的ie增加,大過於市場上介需要,當然價勢就會大跌,變成了便宜貨,汝講係嗎？(走筆連想：在1961年時代,台灣青果合作社賣芎蕉苗分菲律賓一樣,造成台灣芎蕉在日本市場介大影響),又俗語所講：臺灣市場狹hab狹地beˊ！罕honˋ得有三年介好光景,實在一些xidˋ都唔會有爭zenˊ差！
————
◆四.畜金寶螺滿天八地：
四.在五十年前,金寶螺初下在臺灣出現時,在大飯店肚裡愛點一盤由阿根廷引進入來的ie金寶螺肉,時價愛論千銀,實在蓋少人食得leˋ起,由於當初大家對金寶螺感覺到相當稀hiˊ奇,所以又癲起了畜[金寶螺]介熱注。每日在報紙上介廣告欄都有幾下十欄,愛賣金寶螺種介廣告,大家都係想：兩粒金寶螺雖然係六~七百銀,但是論半年後就可生卵來生senˊ細金寶螺,每一粒金寶螺每一期可生論千粒個卵,一年後就可傳到千倍以上了,恁地neˊ算來真係[一本萬利],奈有麼介副業比畜金寶螺較go好介呢？假使照上面所算介[如iˇ意算盤]來算,確實係難尋qimˇ介好副業。但是,由於金寶螺繁殖ciid力非常地遽giagˋ,食性又無嫌hiamˇ,見青色的就愛食,所以頭尾不到兩年,[水溝仔,田坵,大圳]肚裡,處處都有,滿天八地都係金寶螺。

當然,金寶螺介價勢sii就相似股票跌停板一樣,一下地veˊ跌到送人都唔愛moiˊ。雖然肉質差還不在,最得人驚的nge係伊介食性,造成了目前最嚴重的農害。此害留存到今,害政府與農民唔知損失了一多錢,浪費了唔知一多人工。淨淨分製殺蟲劑介農藥廠大好空kangˊ,怪唔得有人講：帶金寶螺入臺灣介人,捉到了愛剝bogˋ伊介皮來曬干gonˊ！俗語所講：阿戇 ngong牯guˋ做生意,會加唔曉除。萬萬無想到畜金寶螺介鄉親,樣ngiongˋ唔會想到金寶螺介繁殖力恁強,又腆tiamˊ放忒 hed[屎多狗飽]介警世道理呢？還講係[一本萬利],實在係相當好騙。大家愛記得：栽培省sangˋ本,畜hiugˋ來又簡單,繁殖力又強的東西,其iaˊ維持高價的期間,必定相似[龍絞gauˋ水]介暴風一樣,一陣地neˊ就風平浪靜了neˊ！
————
◆五.畜蛤蟆仔續變蟾samˇ蜍suˇ佬：
五.在民國七十五年左右,畜蛤蟆仔也係風行一時,由於利潤相當好,所以蓋多人在豬欄間,特別設備後變成蛤蟆間,甚至有企業化大量地來畜。在當初由於利潤好,每一個畜蛤蟆仔介人,都係笑到嘴合唔揫qiuˊ,每日心情都係—等好！
但是,突tudˋ然間,有關衛生單位發表公佈了veˇ講：蛤蟆仔帶有某某病原菌。恁地neˊ一公佈,第二日市場肚裡介蛤蟆仔,隻隻都相似得到大赦sa 一樣,分人無罪開釋的le放生,搞到處處都可看到相做[蟾samˇ普佬]樣地ngeˊ的ge蛤蟆仔。可見現代介人,由於生活水準提高,萬一作物有發現到有害人體者,必定驚死死,唔敢買來食,所以價勢也係大落一場(但像檳榔、菸草二物,雖然有害人體,但一旦上了ngeˇ癮ngian頭以後,實在難來戒掉,又無其他替代品,所以其價格方面,就較不容易跌落。)

又其他像畜白鰻仔neˋ,畜來畜去又變[水畢蛇]樣地下賤qien。明明種的nge高貴鮮花,由於外銷少,市場又細,最後又下賤到相似草一樣,割來堆肥等等農作物敗市症頭,確實搞衰了唔知一多人,有人講：時事多變,價勢更至會變。一些也唔會爭差。

以前有一個相當有經驗戴笠libˋ嫲介老阿伯講：凡事經營當然愛注重[品質與量產]以外,還愛注意伊介市場性。相似割禾曬穀後用來[搶穀] 介風車一樣,開頭經營者；相似風車頭前第一格溜下來的縠樣,該ge就係好穀,分人食介。中間經營者；利成相似第二格溜下來的[二 ngi胖pang仔],係用來攪giauˊ糠hongˊ仔畜雞鴨用介。溜尾才來經營者；其iaˊ利成相似第三格溜下來介,安名為[風車尾],該ge完全係無用的廢穀,只可用來堆肥抑係燒火用。這句話充分表明經營事業,先後的結果實在各有不同。所以凡是經營一定愛講究[市場效益]介遠見,做唔得近視,若係無恁地就會像高樹人所講：大路上掞iam 石灰[白行],以及美濃人睡當晝zu目[白搣miedˋ]介啦！
————
◆本文大意：
本文列舉探討頭擺農家經營各項頭路,淨知取做,每日做到頭犁犁地,結果卻遭受到外來因素狀況,來經營失敗。唔瞭解市場來失敗又還講；手氣唔好所造成介,實在係認命。實際jidˋ上經營事業,唔曉得麼介係愛來看遠景與週邊的市場因素來經營。像本文所提：

第一項：種香茅油外,其他一無用途,這個唯一個用途,用唔到時,就會變成廢物,這就係單項用途產品最大的殺傷力。
第二項：畜鳥仔一事,蓋像作股票一樣,價勢有人暗中炒作,等炒作價勢的人家一縮手時,係唔係價勢會跌到嗶嚦暴落？
第三項：畜臺魚仔,雖然係有利可圖,但飼主貪小利來賣魚種,生senˊ到恁多細臺魚仔,違犯了市場大忌gi [供過於求],其最後也必[屎多狗飽],變成賤貨了。
第四項：畜金寶螺,伊繁殖力相當得人驚,肉質又差,怪唔得拂fud聲地頭尾無兩年,就由惜命的上等東西,變成了農害。假使金寶螺介繁殖力,相似[鹿lug仔]一樣,每年生產量不多時,相信產品在市場上介生命較go耐命。
第五項：畜蛤蟆仔,續sa分人發現到有害人體的病原菌kiunˇ時,一夜之間就變成屋簷下的蟾samˇ普佬一樣。這裡也可想到以前,在臺灣發生霍亂(colela)時, 芎蕉所慘受的命運一樣。但是,檳榔,菸草等作物,雖然受到社會各界反對,麼介食了會發癌ngamˇ,有食的人也係食不誤ngu,這就係由於食者介癮ngian頭,難戒所支持介。
因此,藉本文重提以前農家經濟症頭僅供參考,希望各經營者愛防患頭前所講各樣症ziin頭,以避兇向吉,金玉滿堂,汝講係he嗎？
————
◆本文語音義注解(四縣腔)：
1.和foˇ音：即一邊鋸鉉一邊跟著唱歌。
2.跈tenˇ：跟著。
3.胖缸：即放水或米介大缸仔。
4.米篁fongˇ仔ngeˋ。水篁fongˇ。竹笐gongˇ：竹筒盛器。
5.禾voˇ坪piangˇ上hng：即屋前曬榖之水泥地。
6.[匝biang]啊nga在後背：藏在背後。[匝biang]巾改丙字相當囥kong。
7.米升：量米的筒仔,容量為一升裝。鋸絃hianˇ仔：挨aiˊ絃hienˇ仔。
8.姑goˊ不而 iˇ將：迫不得己將…。
9.覂fung：碗中東西撞倒。
10.後背尾：即背後。
11.樣ngionˋ地ngeˊ：怎zo樣地。
12.恁anˋ地neˊ：這樣地。
13.陪piˇ陣ciin：湊teu陣,在一起,比beˇ陣。
14.畜hiugˋ：養的意思,
15.六畜：牛馬羊雞豬狗,
16.五谷：麻麥米豆粟xiugˋ。
17天光日：即明天。
18.昨co 暗晡buˊ：昨天晚上,昨co夜。
19.溜 liuˋ尾：後來，結果。
20.罕hanˋ得：很少有。
21..屎多狗飽：喻賤物而無人要。
22.[口童]cang：食啊 la忒 tedˋ飽bauˋ。
23.較go後生：比較年輕的。
24.投teuˇ生仔ngeˋ：農家所飼養的雞豬…。
25.汝ngˇ(nˇ)：你nˇ,ngiˇ的意思。
26.煞sadˋ猛mangˊ：努力。
27.話虎膦linˋ：閒聊無意義的話。
27.尖油：即榨油。
28.麼magˋ介：所謂vi,什麼。
29.相爭zangˊ：即爭相、競爭zenˊ。
30.肚裡：客語[裡面]概稱[肚裡]。
31.青絲siiˊ仔：體型像手指公大,青綠色。
32.絡lod興 him：活絡高興。
33.竻nedˋ：剌。剌qiugˋ空,剌qiagˋ字。
34.潑padˋ涼liongˇ：扇風乘涼。
35..一斬zamˋ時間：一斬即一段。
36.打忸nugˋ：心有餘悸gui,發夢驚到緊惇zunˊ。
37.落下遮 zaˊ：即跳降落傘。
38.掞iam 石灰：洒石灰。
39.顧gu 守suˋ：看顧栽培的意思。
40.蹬demˋ腳：踏步。[躪nag,踏dab,蹬demˋ]。
41.手指公：即第一好。
42.手指尾：即最後一名。
43.恁anˋ靚ziangˊ：恁是加強語氣的語首助詞。
44.靚jiangˊ：漂亮,鬧斗。
45..猴死目死：指猴子被捉待殺之可憐相。
46.氣杳meuˋ杳meuˋ地veˊ：指生氣到氣息微小,快要斷氣,喻很生氣。
47.叢cungˇ屋vugˋ：指用茅草來蓋屋頂。
48.草結giedˋ：將草葉類拗 auˋ團成結,供燒火用。
49.蛤haˇ蟆maˇ胲goiˊ：下巴。
50.雞胲goiˊ：吹牛。
51.膦火龐bang著：喻非常生氣。
52.龐著：火著得很旺。
53.番仔neˋ火：即火柴,捽cudˋ仔leˋ火→捽火。
54.點火樣→時間像火燒捽火精仔樣。
55.假黎liˇ仔 ieˋ：即高山族人,番仔：平地番。
56.大膦linˋ杉：大戇鳥。
57.頭犁犁地：頭垂向下。犁 laiˇ犁 laiˇ→[賴 laiˇ]提手部。
58.子ziiˋ(稚)鳥仔：子表示還很幼。
59.無經驗者[子鳥仔]→老伯badˋ勞loˇ。
60.較go 遽giagˋ：比較快。
61.鱉biedˋ：甲魚：台魚：團魚：腳魚。
62.熱注zu：精神非常熱衷灌注。
63.敝bi→台幣bi→作弊bi。
64.屙oˊ疤baˇ症頭：屙疤→屙瀉疤→瀉痢,比喻很糟,不良的病癥。
65.論百銀：論即將近。
66.百過銀：超過一百元。
67.貼diabˋ唔揫qiuˊ：太小貼蓋不住。,貼有(diabˋ,diab,dabˋ,tiabˋ)。
68.落(絡)logˋ食：即覓食,著落各地去找東西吃。
69.時事變天,牛腳向高天：喻時局變得相當大,如牛翻身不起,腳朝天空,危險必死。
70.汶vunˇ水：汶同文音,即濁混不清的水。如泥土水。水清無魚。
71.八特哩：即蓄電池加電壓後,可電魚之器材,英文coiel,音如[開一爐]。
72.金頭：很亮。
73.尷gamˊ 尬 gie：做事不脆又善計較。心中忸怩不安。
74.私胲goiˊ錢：私房錢。[愜hiabˋ,楔xiabˋ,liabˋ,因ngiapˋ(大改又)]。
75.嗶嚦暴落：即掉落得厲害。
76.眼時：眼前,目前。
77.揚尾仔：即蜻蜓。
78.腦囟xin發fagˋ發跳：腦頂門唔曾硬,會緊慱bog,喻無知也。
79.較go中zung：射得很準。
80.哦 oˊ嘮 loˋ：稱讚說好。
81.腆tiamˇ放biong忒hedˋ：忘記。
82.報報bo 滾：大水流的聲音。
83.慱bog慱bog滾：跳得很厲害。
84.恁好空kangˊ：彩頭很好,空kangˊ→kungˊ(北部音)。
85.草脈magˋ仔：草螟仔,草類叢中節肢動物,有多種。禾蝦,花鹿仔,滴嗒哥..。
86.搶到無額ngiagˋ：搶到光光,無剩任何數額。
87.紅毛泥：即水泥,紅毛番：指荷蘭人,水泥→泥水師傅。
88.一口又口：池塘數量單位為口。本文指一口魚塘接著一口造起來,通常一口過一口時,則為[吃了一口又一口]的意思。
89.唔知頭天地：唔知頭[塌tagˋ]：無從下手。[塌tagˋ]糸部首。
90.呸pui呸呸！：呸口潾 lanˊ,カ水,喻為相當反對的意思。潾nanˊ[美濃音]。
91.破缺kiadˋ嘴：如同[烏鴉嘴],出言不吉利的話。缺kiadˋ→kiedˋ(北部音)。
92.發bodˋ眼瘟vunˊ：兩眼昏花,視線摸糊。
93.發bodˋ眼烏 vuˊ：虛暈funˇ。
94.目珠生絲seˊ：眼睛被蜘蛛絲遮蓋,見物含糊不明。
95.生絲：生苔toiˇ。
96.大麻鼓隻：指長得很大。
97.樣ngiong得生死：不知如何是好。
98.大麻鼓箍 koˊ：指長得很胖,大麻鼓＋[條,隻,空,雨],箍 kieuˊ[北音]。
100.一些xidˋ都唔會爭差：一點點都不會有差錯。
101.滿天八地：即滿天滿地,喻處處皆是。
102.還不在cai：即[還不在話下]的簡略語,無打緊。
103.愷kuaiˇ仔：比戇稍好,是金光黨中扮演主要角色。
104.蓋嘳kuaiˇ：很貧窮(東勢.高樹話)。
105.蟾samˇ普佬 loˇ：癩蛤蟆,蟾蜍cuˇ。
106.胖缸肚一隻大龜仔：比喻無米,水。
107.水畢蛇：即水蛇。與鰻相似,有鱗。
108. 搶穀：利用風力來分離穀子的品級。
109.風車：即圓形轉動扇片,供分離五穀品級的農具。非發電用的風車。
110.二 ngi冇pang仔：指穀仔未成熟也係米槳無充實者。
111.二(ngi)即[第二]的意思,通常有人罵人[二冇仔](又稱二含hamˇ仔meˋ)：指人品非上等者。
112.風車尾：即分風車的風,吹在最後面的廢類穀物,因廢穀或雜葉,灰塵較輕,吹在後面者,皆為無用途的穀物,比喻稱為[風車尾]。
113.取qiˋ做：即認真但笨笨地做。
114.取食：只管吃不做。
115..拂fud聲地：同忽fudˋ聲地,很快的意思。
116.耐nai 命：壽命比較長。
117.麥mag酒：啤piˇ酒。
118.癮ngian頭：強烈愛好心願的念頭,如同煙ianˊ癮ngian→癮ngien(北部音)。
==========